وقت العتب راح لا ترجع تعاتبني

وقت العتب راح لا ترجع تعاتبني
مات الامل مابقى شي ب وجداني

ماني مثل ما انت خابرني وتحسبني
حبيبك الاول اصبح واحد ثاني

خلاص مات الهوى لاتهدم ولاتبني
تركتني لين جاء النسيان ناداني

العام ادور سبب منك يقربني
واليوم ادور سبب عشان تنساني

بعثرتني في هواك اليوم رتبني
نسيتني الناس شفني صرت وحداني

كان السهر في هواك اللي محببني
والحين حتى السهر يكبر على اجفاني

اجيك يمحيني عتابي ويكتبني
مافيه طاري عتب يمر ماجاني

وارجع وانا اقول : وش للجرح جايبني
ادري بجرحك ولا ادري وش وداني

عن صدق الاحلام جاء الواقع وكذبني
وعن فرح الايام جاء حبك وبكاني

مليت اشيل الامل والدمع يغلبني
واقول بكره يجي للشوق يلقاني

ويروح بكره واجي والوقت قالبني
وارجع على وحدتي واحزاني .. احزاني

بكيتك العمر كله يا معذبني
وش فيك ماتبكي الليله على شاني

كتبت ماهو عشان تقول عاجبني
مليت من جزله وصح الله لساني

انا وطن شعر لو شعري مغربني
كتبت اجمل جروحي لجل تقراني

خلاص لا تتعب وترجع تعاتبني
انا نسيتك دخيل جروحك انساني